FALTRIQUEIRA

DOSSIER

Máis de vinte anos despois, Faltriqueira vive un momento especialmente fértil. A experiencia acumulada, as transformacións persoais e a evolución da propia industria musical deron lugar a unha proposta aínda máis sólida, na que a madurez artística convive coa curiosidade, o risco e unha enerxía escénica intacta.

O seu directo segue a ser o seu maior patrimonio. Catro voces, catro pandeiretas e unha complicidade construída ao longo de toda unha vida converten cada concerto nunha experiencia profundamente humana. Elegancia, emoción, humor e unha intensidade contaxiosa fan de Faltriqueira unha proposta capaz de conectar con públicos moi diversos desde a verdade da súa interpretación.

Nun momento no que a música de raíz vive unha extraordinaria proxección internacional, Faltriqueira continúa a ocupar un lugar propio. Non por seguir tendencias, senón por contribuír a abrir un camiño que hoxe segue inspirando novas xeracións de creadoras e intérpretes.