Faltriqueira encarna a corrente máis fresca do panorama xurdido das fontes da música tradicional. Fusionando a polifonía coas percusións e os instrumentos acústicos. Faltriqueira son un proxecto vocal autónomo que foxe da ríxida tradición e dota de nova vida a cancións recollidas en Galicia e diversas latitudes.
Os de Orballo recollen a herdanza tradicional das cantantes pandeireteiras empapándoa da súa mocidade, naturalidade, gusto e achegamento a diferentes estilos musicais próximos e afastados xeograficamente. Colaboraron en gravacións e acompañaron en concertos a Luar na Lubre, Mike Oldfield, Oskorri, Kepa Junkera, Víctor Manuel, antes e despois dun debut discográfico editado a finais de 2002 e distribuído por medio mundo.
Ábrese unha nova etapa para este grupo de mulleres que traballan xuntas na música tradicional e orixinal desde moi novas. Comezaron a súa andaina nun grupo folclórico no seu Pontedeume natal e pronto destacaron como profesionais logrando vinte anos de viaxes e festivais tanto a nivel nacional como internacional. Agora, logo dos procesos de introspección individual que trae a maternidade, recuperan forzas para encarar desde a madurez que outorga o tempo unha nova etapa onde poden reflexionar sobre o seu interior, ritmo e melodía. Continúan o proceso traballando co produtor dos seus discos, Pascal Gaigne, gañador dun Goya á mellor BSO en 2019. Con Pascal editaron dous discos de recoñecido prestixio no campo das músicas do mundo, convertendo o nome de Faltriqueira nun dos máis apreciados polos profesionais do sector. No equipo de traballo desta nova etapa tamén se destaca ao músico e produtor Jorge Juncal, integrante da banda desde 2004.
A mirada é cara ao futuro, e coa necesidade de expresar o proceso transformador que é converterse en nai, e o que isto significou como familia musical. A convicción de traballar a terra, protexer a semente e deixar un legado de honestidade e verdade aos nosos fillos, nutre a voz de Faltriqueira disposta a cultivar o que leva dentro para que floreza cun novo ciclo de luz.
